Poems of Taliesin

I. Trawsganu Kynan Garwyn Mab Brochfael [BT 45]

(To Kynan Garwyn son of Brochfael)

Kynan kat diffret

am arllofeis ket.

kanyt geu gofyget,

Gwrthelgwn trefbret.

kant gorwyd kyfret

aryant eu tudet.

Cant llen ehoec

o vn o vaen gyffret.

5

Cant armell ym arffet.

A phympwnt cathet.

Cledyf gwein karrec

dyrngell gwell honeb.

cant kynan kaffat.

kas anwelet

katellig ystret.

kat anyscoget.

kat ar wy kyrchet.

gwaywawr ebrifet.

10

Gwenhwys a ladet.

A lafyn gwyarlet.

kat ymon mawr tec.

erglyt a molet.

Tra menei mynet

gworwyd a gworgret.

kat yg cruc dymet.

aercol ar gerdet.

Nac ny rywelet

y biw rac ffriw neb.

15

Mab brochuael brolet.

Eidywet eidunet.

kernyw kyfarchet.

ny mawl ieu tyghet.

Dystwe aghyffret

ynyd am iolet.

Myg kynnelw o gyann,

kadeu ergynnan.

Aeleu fflam lydan.

kyfwyrein mawrtan.

20

kat ygwlat brachan.

katlan god aran.

Tegyrned truan

crinyt rac kynan.

lluryc yn ymwan.

eissor llyw heechan.

kyngen kymangan.

nerthi athwlat lydan.

kigleu ymdidan.

pawb yny gochvan.

25

kylch byt gwochuan.

keith ynt dy gynan.